वर्ल्डलिङ्कले दुई वर्ष अगाडि स्थापनाको २५ वर्ष पूरा भएको उपलक्ष्यमा देशका दुर्गम सहित सबै जिल्लामा फाइबर इन्टरनेट पुर्याउने लक्ष्य लिएको थियो । सोही लक्ष्य पूरा गर्ने यात्रामा एउटा महत्वपूर्ण कार्य सम्पन्न भएको छ जुम्लामा फाइबर इन्टरनेट पुर्याएर ।
कर्णाली प्रदेशको सबैभन्दा ठूलो शहर सुर्खेत हो भने त्यसपछिको ठूलो शहर जुम्लाको खलङ्गा हो । यही खलङ्गामा चैतको पहिलो साताको बुधबार कम्पनीका प्रबन्ध निर्देशक दिलिप अग्रवालले जुम्लाबाट सुरू भएर कर्णालीका सबै जिल्लामा फाइबर इन्टरनेट सञ्चालनमा ल्याउने र काम सुरू भइरहेको पनि बताएका थिए ।
यो सँगै जुम्लामा फाइबर इन्टरनेट पुर्याउने वर्ल्डलिङ्क पहिलो कम्पनी बनेको छ । काठमाण्डुमै उपलब्ध उच्च गतिको फाइबर नेट सुरू गरेको कम्पनीले लगभग पैसा पनि उस्तै-उस्तै लिएको छ । जस्तै ८० एमबिपिएस फाइबर नेटको लागी वर्ल्डलिङ्कले रू १४०० प्रति महिना लिनेछ ।
खलङ्गामा वर्ल्डलिङ्कले आयोजना गरेको कार्यक्रममा बोल्दै कम्पनीका प्रबन्ध निर्देशक अग्रवालले भने, “जुम्लामा इन्टरनेट पहिले हामी वायरलेसबाट ल्यायौँ, त्यसपछि हामीले फाइबर पनि जोड्यौँ । यो फाइबर जोड्नमा धेरै ठूलो लगानी हुन्छ तर हामी त्यो लगानी गर्न तयार छौँ किनभने हामीसँग बिआइआइ (ब्रिटिश इन्टरनेशनल इन्भेष्टमेन्ट) जस्ता इन्भेष्टरहरूको साथ छ ।”
उनले थपे, “उनीहरूले हामीलाई विश्वास गरेर इन्टरनेटको पहुँचले विकास हुन्छ त्यो शहरको । त्यो धारणा लिएर वहाँहरूले हामीमाथि लगानी गर्नुभयो । र हामीले वहाँहरुको पैसा लिएर जुम्ला शहरमा इन्टरनेटको पहुँच विस्तार गरेका छौँ । नाफा त सबैले कमाउन चाहन्छन् । कम्पनीको स्थापना नै नाफा कमाउन हुन्छ । तर हाम्रो लक्ष्य नाफाभन्दा माथि छ । हामी कर्णाली देशको विकास गर्न चाहन्छौँ ।”
बिआइआइले सुर्खेतबाट खलङ्गासम्म फाइबर पुर्याउनमा प्रमूख भूमिका खेलेको छ । त्यसको लागि वर्ल्डलिङ्कले २३५ किमि फाइबर बिछ्याएको थियो र करिब १५ करोड लगानी गरेको थियो । बिआइआइको सहयोग भएकाले वर्ल्डलिङ्कलाई लगानी र ब्याजको भार कम पर्ने भएकोले पनि कम्पनी चाँडै नै खलङ्गा आउन सफल भएको हो ।
जुम्लाजस्तो विकट जिल्लाको सदरमुकाममा फाइबर नेट पुर्याएसँगै वर्ल्डलिङ्कले अन्य जिल्लामा समेत यो सेवा पुर्याउने आशा र अपेक्षा बढेको छ । योसँगै अन्य कम्पनीहरू पनि यी क्षेत्रहरूमा सेवा पुर्याउन आउने अपेक्षा गरिएको छ । जुम्लाबासीले यो सेवाबाट आफू हर्षित भएको प्रतिक्रिया दिएका थिए ।
दुर्गम जिल्लाहरूमा फाइबर नेट पुर्याउन चाहिने पुँजी ब्याङ्कको ऋण, आन्तरिक स्रोत इत्यादि बाट पुर्ति गर्ने र वैदेशिक सहयोग नचाहिने दाबी वर्ल्डलिङ्कका प्रबन्ध निर्देशकले दुई वर्ष अगाडि गरे पनि बिआइआइको सहयोग लिएर ऊ जुम्ला पुगेको हो ।
कर्णालीका दुर्गम सहित सबै जिल्लामा फाइबर नेट पुर्याउने लक्ष्यको लागि जुम्लाको सफल सुरूवात एउटा कोसेढुङ्गा हुन सक्छ । कर्णाली प्रदेश देशकै सबैभन्दा दुर्गम र विकट क्षेत्रको रूपमा कहलिएको छ ।